Weblog Sybren Posthumus

fakatuere: EFA-stazjêre/traineeship

De EFA, de Europarlemintspartij fan regionale partijen dêr't de FNP ek by oansluten is, siket in stazjêre foar 3 moanne (jannewaris-maart 2009). De ynhâld fan de staazje sil safolle mooglik oanslute op kennis en kapasiteiten fan 'e stazjêre. Stânplak is Brussel. Belangstelling foar Europa, kennis fan talen en PC/kompjûterfeardichheden binne wol eask fansels.

Lês hjirre de advertinsjetekst, en mear ynformaasje. Foar fragen oer de EFA, FNP kinst ek kontakt mei my opnimme (adresgegevens hjirneist). Ast reagearrest, súkses!

chemtrail alert system

Op 'e Kanadeeske webside www.owsweather.com fynst it offisjele 'Chemtrail Alert System'. De alderearste dy't stipe wurdt troch in meteorolooch dy't fan it bestean fan chemtrails op 'e hichte is. 

Op 'e side wurdt û.o. oanjûn yn hokker lannen en op watfoar dagen der sproeid wurde sil. Sjoch nei de loft en ferlykje it mei de data op Owsweather.com

vermist, opsporing verzocht...

Oan 'e oarder fan 'e dei, en yn 'e publisiteit gigantysk útfergrutte. Fermissings fan persoanen, opspoaringsberjochten, identiteitsûndersiken fanwegen adresfraude (PvdA wol yn grutte stêden hûs-oan-hûs kontrôles hâlde) en kwestjes, ensfh. Geregeld wurde ek helikopters ynsetten, of waarmte-detektoaren. It is werklik de iene nei de oare, hâld it mar ris yn 'e gaten. Lykwols, lang net altyd is nei te gean oft der echt wol sprake is fan in fermissing of dat it optocht is. Yn in eardere weblog (6 juny 2007) hie ik al ferwachte dat dit der oan komme soe. En earlik sein tink ik dat it noch wol efkes trochgean sil. Oant op in bepaald stuit de oplossings oer it fuotljocht komme sille. Hjoed gong it oer in alaarmsysteem foar stalkingsslachtoffers. Fansels op basis fan in soarte fan GPS-navigaasjesysteem mei in ynboude chip. As jo net allinnich de mainstream-media folgje mar ek de wat kritysker media dan is it allegear net sa'n ferrassing mear. Sa soenen de machtigen fan dizze wrâld yn juny besletten hawwe om elkenien in ûnderhûdske tsjip te jaan. Skokkend om te fernimmen hoe hurd it grutte publyk 'bewurke' wurdt om it allegear yn te fieren.

Friezen polityk ferienige troch EFA

Hjoed is it dan sa fier! De SSW (partij fan de Denen en Friezen yn Sleeswyk-Holstein) hat fan 'e moarn besletten om as lid ta te treden ta de EFA. En dat is foar de Fryske polityk in trochbraak, want dan binne alle Fryslannen (Noard- East- en Easterlauwersk Fryslân) fertsjintwurdige yn de Europarlemintspartij de EFA. De FNP al as oprjochter sûnt 1981, Die Friesen sûnt begjin dit jier yn Bilbao en dan takom jier de SSW as de algemiene gearkomste yn Kataloanje dermei ynstimt. En dêrmei komt dan ek in offisjeel platfoarm om as Friezen oer de steatsgrinzen hinne mei elkoar te oerlizzen. De kontakten wienen der fansels al, mar se kinne no fierder yntinsivearre wurde en it wurdt noch in stapke makliker om mei konkrete inisjativen te kommen. Yn dy sin is wat der lêstendeis yn de Ljouwerter krante stie no werklikheid wurden: Friezen samen in Europese partij. Fan dit plak ôf wol ik elkenien tanksizze dy't op hokfoar wize dan ek meiwurke hat oan it tastânkommen fan dit risseltaat.

ynstoarten Amerikaanske ekonomy moedwillich?

Yn in eardere blog (18 july 2008) hie ik op basis fan in berjocht op in Australysk ynternet-side al trochskimerje litten dat ik ek persoanlik yn septimber in finansjele crash ferwachte. Der hat in geheime gearkomste west yn it 'House of representatives', foar it earst wer yn 25 jier dêr't oer it plande ynstoarten fan de Amearikaanske ekonomy yn septimber 2008 praat is. En wat slimmer is, folge troch dy fan de oerheid begjin 2009 en it massaal oppakken fan minsken dy't yn protest komme. En no is it oangeande dy finansjele crash al safier...

UPDATE 22 septimber: sjoch dit stikje mei filmke en dit oangripend en skokkende filmke...

Ien plak foar Europarlemint

Op it stuit komt it Europeesk parlemint allinnich mar gear yn Brussel, en in skoft lang net mear yn Straatsburch. De reden? Yn 'e simmerfakânsje is sawat 10.000 kilo beton út it plafon op 'e stuollen fan 'e politisy fallen (sjoch foto). Yn it dak fan it gebou (noch mar 9 jier âld) binne yn 'e tuskentiid noch mear skuorren en oare swakke plakken konstatearre.

Wat is der no noch mear oan 'e hân? It Europeesk parlemint is it iennige parlemint yn 'e wrâld dat sawat permanint op twa lokaasjes gearkomt (Brussel en Straatsburch). En de kosten? € 200 miljoen op jierbasis. Dat is sawat € 0,50 de boarger. Liket net in soad, mar dat is wol in bedrach dêr't bygelyks in stêd as Ljouwert, mei 95.000 ynwenners, alle jierren de sinteklaasyntocht of in grut part fan 'e kosten fan it âld- en nij feest mei bestuiverje kin (wat altyd wer mei lijen byelkoar finansierd wurde moat). En yn in plak as Reduzum, mei 1100 ynwenners, kin mei in goede € 500 in moaie aktiviteit foar de skoalbern betelle wurde. Ik bedoel mar. De hiele moanlikse karrousel fan Brussel nei Straatsburch en werom moat mar ris dien wêze. In relikt út it ferline, dêr't lidsteat Frankryk blykber fûl foar striden hat, mar wat net mear te ferantwurdzjen is. Dit binne saken dêr't boargers har yn myn eagen terjochte lilk oer meitsje. It ynstoarten fan it dak liket my in moai momint om nochris te sjen oft dit wier net oars kin.

Grinskontrôles werom en yntinsiver?

In skoftke lyn hawwe wy de oprop dien wat der oars moatte soe yn Europa. Noch hieltyd - oant novimber - binne meldings wolkom, ek fia dizze website. Persoanlik wie ik de lêste dagen (sjoch eardere blog) yn Flensburch. It is my opfallen dat der, yn tsjintstelling ta in pear jier lyn, wer folle mear grinskontrôles binne. Yn Flensburg fertelde in taksysjauffeur my dat er oanhâlden wie troch de Deenske plysje om't er in pear flechtlingen yn 'e taksy nei Denemarken oerbrocht hie en dêr in hiele fikse boete oan oerhâlden hie. De rjochter fertelde him dat er eins earst goed kontrolearje moatten hie wa't de minsken wienen foardat er se de grins oersette soe. Eins kaam it der op del dat de taksyman de rol fan 'e plysje oernimme moatte soe. As er wer yn oertreding komme soe, koed er in finzenisstraf fan 50 dagen krije! Dat lot treft net allinnich him, mar alle taksysjauffeurs yn it Deensk-Dútske grinslân. Jo kinne jo yntinke dat doe't ik fertelde dat ik dêr út namme fan in Europeeske politike partij wie, hy fuortendaliks begûn te rachen op alles wat Europa wie, want dy hienen dat allegear betocht, wie it net? 

Tusken Leer (East-Fryslân) en Nijeskâns tilde it juster ek op fan 'e plysjes, sawol yn 'e trein as op 'e dyk. Dat, wylst yn it akkoart fan Schengen ôfpraat wie dat 'ynterne' kontrôles by de binnengrinzen allinnich yn in beheinde perioade soenen yn it gefal fan ûnfeiligens of as de iepenbiere oarder dat fereaske. Hokker ûnfeiligens of oantaasting fan de iepenbiere oarder wie juster of de lêste tiid oan 'e oarder? De plysjes makken ek op in rare wize gebrûk fan har macht en autoriteit; in pear frij donkere minsken waarden tidenlang ûnderfrege wylst harren paspoart gewoan yn 'e oarder wie en, gebrûk meitsjend fan har macht en autoriteit, in kreaze jonge dame waard útkloarke wêr't se weikaam en wêr't se hinne woe.

Dat is net it Europa fan de frije grinzen dat wy foar eagen hawwe. It heart ek foar it gefoel in frij reizgjen te wêzen, sûnder allegear kontrôles.

NB: hasto ek ûnderfinings lykas boppesteand, lit it witte!

Reis Flensburch - in persoanlik drompeltsje oer

Der binne guon mominten yn je libben, dat jo josels suver in bytsje 'oerstige'. Juster wie ik foar de EFA by de SSW (partij fan Denen en Noardfriezen yn Sleeswyk-Holstein), yn Flensburch. Sy tinke deroer om lid, of ynearsten waarnimmer, te wurden fan 'e EFA. En, as bestjoerlid fan de EFA haw ik dêrom in presintaasje fan sa'n 20 minuten hâlden, yn it Dútsk! En nei it skoft hie de seal mei sa'n 25 minsken aardich wat krityske fragen. Dy't ik dan fansels ek wer yn it Dútsk, myn fjirde taal (nei myn memmetaal, dêrnei Nederlânsk en Ingelsk), beantwurdzje moast. Ik haw it sa goed en sa kwea as yn myn fermogen lei dien (sit ek noch mar oardel jier yn it EFA-bestjoer). Gelokkich haw ik op it Ateneum eksamen dien yn it Dútsk en it wat ûnderhâlden, dat skeelt fansels. It Haadbestjoer fan de SSW hat úteinlik in stimming hâlden, en dêrby wienen 22 fan 'e 25 foar dielname oan 'e EFA en der wienen 3 ûnthâldings. Op 20 septimber beslute de leden fan 'e SSW deroer, no dus mei in posityf advys fan har bestjoer. Spannend. Alles mei alles in lange, mar slagge reis.

Oprop foar ynbring yn program Europeeske ferkiezings

De FNP ropt minsken yn Fryslân op om mei punten te kommen dy't fan belang binne foar de Europeeske ferkiezings fan 2009. Takom jier binne dy ferkiezings (juny 2009), en de FNP wol yn Fryslân neigean wat der libbet as it om Europa oangiet. De saken dy't nei foaren brocht wurde troch ynwenners, bedriuwen en  organisaasjes yn Fryslân, kinne dêrnei troch de FNP by de Europarlemintspartij EFA by it besprekken fan it programma foar de kommende jierren ynbrocht wurde. Yn febrewaris 2009 wurdt it programma fan de EFA fêstlein yn Bilbao (Baskelân) en dêr is ek in delegaasje fan de FNP oanwêzich.

De FNP is lid fan de EFA en is dêr ek yn it bestjoer fertsjintwurdige. De EFA hat op dit stuit 6 minsken yn it Europeesk parlemint. 
Foardiel fan de kontakten op Europeesk nivo fan de FNP te'n opsichte fan de partijen yn de Twadde Keamer is dat de FNP streekrjocht kontakt hat tusken de regio Fryslân en syn ynwenners en de Europarlementariërs. As der wat spilet kin de FNP dêrtroch fluch en sûnder 'yntervinsje' fan hegerop operearje.

Hast goede programmapunten? Nim foar 1 novimber kontakt mei my op, oer de mail of tillefoan (sjoch foar adresgegevens hjirneist op dizze site).

Dennis Kucinich's Wake Up Call - machtich!

Genietsje fan in machtich moaie taspraak, fia dit filmke. Persoanlik haw ik se sa noch net earder meimakke. Wekker-wurd polityk fan de boppeste planke. Demokraat (kongreslid) Dennis Kucinich fertelt Amearika de wierheid. Mar de ynhâld fan syn speech jildt yn prinsipe foar alle westerske lannen; wy wurde op grutte skaal bedondere troch ús regearen.

oantaasting privacy - oantaasting fan frijheid

Hjoed efkes nei de toskedokter west (lokkigernôch gjin gatsjes of oare mankeminten). Oant safier neat bysûnders. Mar, by it meitsjen fan in nije ôfspraak kaam it hege wurd der út. Doe't ik achter de assistinte stie en seach hoefolle persoanlike gegevens fan my oer it byldskerm rôlen, ferûntskuldige de toskedokter him suver en die syn beklach. Alle ynformaasje oer syn pasjinten wurdt opeaske troch de oerheden en opslein yn sintrale databases. It gong him dúdlik te fier. Hjoed wie der mear nijs oer de oantaasting fan ús persoanlike privacy.

Supermerken stimulearje it pinnen en remje it kontant beteljen ôf. Wat sit hjir wier efter? Stel dat der skielk helendal gjin mooglikheid mear wêze soe om kontant te beteljen, dan kin it regear alles folgje wat jo dogge. Alle betellings wurde registrearre en dat kin kontrolearre wurde. In skoftke lyn die D66 in oprop foar in 'Volksopstand' fanwege alles wat der geande is. It seit wol wat dat in demokratysk keazen partij dy't op alle nivo's fertsjintwurdige is al sa'n oprop docht!

Slim soargen meitsje ik my oer wat de lêste tiid bart is mei it near lizzen - ek yn Nederlân - op krityske minsken dy't dit allegear oan 'e oarder stelle. In skoft lyn hat bygelyks de redakteur fan stormwaarschuwing.nl syn wurk dellein. In skoftke hat er syn warskôgjende wurden en wêrom as er ophâlden is noch ferantwurde op dizze site, mar neffens syn sizzen waard er sa bedrige dat er in ein makke hat oan syn krityske teksten oer de Nije Wrâld oarder, kampen yn Amearika ensfh. En hjoed wie der noch nijs dat krityske media of persoanen ophâlde moasten: Adam Curry moast by Arrow radio wei en twa programma's fan RTL binne fan it ynternet helle. Op hokker momint giet oantaasting fan privacy oer yn oantaasting fan ús frijheid?