Weblog Sybren Posthumus

Foarsitter FNP Boarnsterhim

Sûnt koart bin ik foarsitter wurden fan de FNP-ôfdieling Boarnsterhim (sjoch ek de webside). Troch in tal ynterne wizigings wie dy funksje fakant en ik bin frege om it bestjoer te fersterkjen. Nei it riedslidmaatskip yn Ljouwert hie ik wol nocht oan in nije útdaging. It bestjoer fan 'e FNP is no wer op folle sterkte, wol handich no't wy wer rjochting ferkiezings ta geane. Yn Boarnsterhim is genôch wurk oan de winkel, tinkt my en dan benammen yn ferbân mei de problemen by de gemeente. Ik haw fansels oars ek genôch by de ein, mar nim dit stik ferantwurdlikens op my. Sjen wat wy dwaan kinne foar it algemien belang.

Boarnsterhim: It moat earst op syn slimst...

It negative nijs fan en oer Boarnsterhim kin hast net op in minder momint komme. It Ryk, dat wol sizze Bos, Balkenende cs hawwe oankundige dat der tusken € 12 en € 40 miljard besunige wurde sil. Alteast, dat moatte wy ôfliede út berjochten út 'e krante. Lit ús mar útgean fan in bedrach fan € 20 miljard euro. Slim genôch fansels. En, tink mar net dat se op de JSF besparje sille. Nee, jo en ik sille it belije moatte. En dat betsjut ek nochal wat foar gemeenten. Under it motto 'Meielkoar trep op, meielkoar trep ôf' is nammentlik ôfpraat dat as it goed giet, de ynkomsten fan de gemeenten (gemeentefûns) lykop gean mei dy fan it Ryk. En oarsom. As wy útgeane fan de besuniging fan 20 miljard op in ryksbegrutting fan 222 miljard (dat is dus 9 prosint), dan hat dat fan gefolgen dat (rûchwei) 1,45 miljard op in bedrach fan dik 16,1 miljard (bedrach gemeentefûns 2009) besunige wurde sil. As jo dan sa'n bedrach fan 20 miljard hearre, koe ik it noch net helendal yn in ramt pleatse. Mar as jo sjogge dat it hast 10% fan 'e ryksbegrutting is, dan skrik ik yn alle gefallen wol eefkes. De gefolgen foar gemeenten as Boarnsterhim en Ljouwert? Net in lyts bytsje. Yn 'e sirkulêre oer it gemeentefûns fan septimber 2008 krijt Boarnsterhim foar de WMO € 1,53 miljoen en fan it gemeentefûns € 15,9 miljoen. Mei-elkoar € 17,4 miljoen. Dat betsjut takom jier neist de oankondige € 2 miljoen noch in fierdere besuniging fan € 1,6 mljoen? Foar in gemeente as Ljouwert binne de sifers noch dramatysker. Totale útkearing yn 2009 € 121,5 miljoen euro. Mei 9 prosint minder in besuniging fan € 10,9 miljoen yn Ljouwert op jierbasis? Bestjoerders, riedsleden en ynwenners, hâld jo fêst...

B&W Boarnsterhim fuort; holle koel hâlde en oprêde

In raar 'Sint-Piter-kado', sa krekt foar de Sint Piter-fiering yn Grou (21 febrewaris). It kolleezje (gemeentebestjoer) fan Boarnsterhim is opstapt. Dat betsjut dat wy as ynwenners fan dizze oars prachtige gemeente sûnder bestjoer sitte. Dit  kolleezje hie al earder opstappe moatten, sa is my wol dúdlik. De FNP-fraksje yn 'e rie hat ek alris sa'n moasje ynbrocht yn ferbân mei in tal wanprestaasjes. Mar in grut part fan de gemeenteried, dat wol sizze de kolleezjepartijen CDA en PvdA, kinne har dit ek oanlûke. In moasje fan de FNP om ris goed te ûndersykjen wat no de oarsaken binne fan de minne finansjele situaasje en dêr learing út lûke hawwe se net stipe. Dat is de kop yn it sân stekke.

Op dit stuit hat achterom sjen net folle doel mear. Jo moatte nuchter foarút sjen en stadichoan wer stapkes foarút sette. Te begjinnen mei in iepenbiere 0-mjitting. Alle feiten op tafel, finansjeel, organisatoarysk en útfiering fan belied. En yndied, jo sille mooglik in artikel 12-status krije. Mar dat kin jo wol helpe om berch op. Freegje ek aktyf de ynwenners om rie. De rekkenkeamer docht al in oprop fia de webside! Wat de takomst fan 'e gemeente oangiet moatte jo altyd hoopfol wêze. Der hawwe wol mear gemeenten west dy't in beskate perioade yn finansjeel swier waar sitten hawwe. Gaasterlân-Sleat in skoft lyn, Frjentsjerteradiel en ek Ljouwert mei de OZB-krisis 1,2 ensfh. Ik bin benijd wat der moarn sein wurdt yn 'e iepenbiere gearkomste. As nije (waarnimmend) foarsitter fan de FNP yn Boarnsterhim sil ik fansels in eachje yn't seil hâlde en dêr't dat kin of nedich is helpe om 'op te rêden'.

Mars foar ûnôfhinklikens Kataloanje yn Brussel

Op 7 maart sil it heve, in grutte optocht foar in eigen Katalaanske steat. Net yn Barselona, mar yn Brussel. Se komme mei 10.000 minsken, is de bedoeling... Fleantugen, bussen en TGV-treinen tusken Barselona en Brussel sille wol fol sitte op 6 maart. Op dizze webside is mear te lêzen oer de aksje. Se hawwe ek in Facebook-side iepene. Lês hjirre de offisjele reaksje fan de EFA, de 'memme-partij' fan de FNP op Europeesk nivo. Yn 'e wurden fan ús foarsitster Nelly Maes: “if the EU does not respect the regions and nations in Europe that it’s basically the EU that promotes independentism. The EU in this way brings more and more communities in Europe to claim for an own state. We support thus the Catalan cause since neither Madrid nor Brussels gives them the respect and institutional place they deserve.”

klacht by VROM-ynspeksje oer Ljouwert

As riedslid haw ik yndertiid in soad kontakt hân mei in De Jong út Kammingabuorren (Uilenburgstate). Dat nei oanlieding fan it net neikommen fan bestimmingsplan-bepalingen yn in lyts part fan it Griene stjer gebiet fan Ljouwert. It is sa dat dêr in iepen en sljocht terrein komme soe, mar it omkearde ûntstie: allegear boskjes en bulten. It frije útsjoch wat de minsken earst hienen en wat fêstlein wie yn it bestimmingsplan is fuort. Op in bepaald stuit hawwe wy dêr ek fragen oer steld en in diskusje oer hân yn 'e gemeenteried. Ta in útdragen saak is it nea kommen. De kolleezjepartijen wienen it wakker iens mei de wethâlder en dan slane jo gjin dûk yn in pakje bûter ek al stiet it gelyk oan jo kant. Mar, no al wer jierren letter spilet it bestimmingsplan fan it Griene stjer gebiet en de man grypt no syn kâns. Rjocht sette wat net doogd. Om't er by amtners, bestjoerders en gemeenteried nul op it rekest krigen hat, tsjinnet hy no in klacht yn tsjin de gemeente Ljouwert by de VROM-ynspeksje. Hy hat my jûn belle en op 'e hichte steld. It is neffens my in goede saak dat boargers oanhâlde as storein as se yn har rjocht steane. Ik bin benijd hoe't it no ôfrinne sil...

Protestboerd yn Akkrum

boarne: Omrop Fryslân: Op it eveneminteterrein yn Akkrum is in protestboerd delset tsjin de grûndeal fan de gemeente Boarnsterhim mei wenningkorporaasje Welkom. Op it boerd neamt Pleatslik Belang fan Akkrum de grûndeal in wanhoopsdie.

De gemeente wol ferskate wenningboulokaasjes yn de doarpen ferkeapje. Dat smyt mei-inoar tsien miljoen euro op. Ek it eveneminteterrein soe ferkocht wurde, mar Pleatslik Belang is it dêr net mei iens.

De gemeente kin de sinten goed brûke, om wat te dwaan oan de minne finansjele posysje.

steaten Amearika los fan federaal regear?

Kloppet it dat mar leafst 10 fan 'e 64 steaten har souverein ferklearje wolle fan it sintrale federale regear yn Washington? Of, mooglik sels 28 yn 2009? En wêrom komt dat net yn 'e media? Yn dit artikel (en hjir ek) is dêr mear oer te lêzen. It sitaat wat my op in bepaald stuit oergryslik oansprekt: 'De overheid moet weer terug naar de burgers en zo dicht mogelijk bij de lokale bevolking gaan functioneren'. Betsjut dit alles de ein fan 'e USA sa't wy dy no kenne? Ik bin benijd hoe't ien en oar regele is yn it ferdrach fan Lissabon (dat gjin Europeeske grûnwet hjitt mei). Dêr stiet yn dat der by in frijwillich weromlûken in akkoart sletten wurdt ta úttreding. 'Het akkoord wordt namens de Unie gesloten door de Raad, die met gekwalificeerde meerderheid van stemmen besluit, na goedkeuring door het Europees Parlement'. Dêrby moat sein wurde: 'Onder gekwalificeerde meerderheid van stemmen wordt verstaan ten minste 72% van de leden van de Raad die de deelnemende lidstaten vertegenwoordigen waarvan de bevolking ten minste 65% uitmaakt van de bevolking van die staten.' It wurdt de lidsteat net maklik makke. De grûnwet fan 'e EU kin noch frij lang fan tapassing wêze as der sprake is fan in weromlûken: pas nei it sluten fan boppeneamd akkoart of twa jier nei it berjocht fan opsizzen fan de lidsteat oan de EU.

FNP solidêr mei it Tibetaanske folk

It is dit jier 50 jier lyn dat de Tibetaanske folksopstân begûn, op 10 maart 1959 yn Lhasa en de Dalai Lama dy’t doe nei India flechte.

Yn 2008 binne der wer op grutte skaal protesten útbrutsen yn Tibet.

Yn de hoop dat harren protest yn de oanrin nei de Olympyske spielen heard wurde soe troch de ynternasjonale mienskip gongen Tibetaanske muontsen en boargers op 10 maart 2008 de strjitte op om harren miening te jaan en harren ûnfrede te úterjen .

In protte Tibetanen binne nei dy protesten oppakt en moatte no harren straf út sitte yn de finzenis mei straffen fan 8 jier oant libbenslang! 

Wy as FNP wolle solidair wêze mei de Tibetanen en as teken fan solidariteit hawwe wy krekt as ferline jier it kolleezje frege, op 10 maart de Tibetaanske flagge út te stekken.

Boarne: FNP Boarnsterhim.

'Karrespoar' wurdt 4-baans autodyk

It heucht my noch as de dei fan juster. Wy wienen as FNP-fraksje troch de nije boargemaster, Dales, útnoege foar in petear. It wie yn 'e lêskeamer fan de ried, yn it âlde/fernijde stedhûs fan Liwwadden. Hy frege ús allegear wat wy dienen, in koart rûntsje foarstelle en dêrnei de politike ynhâld fansels. Hiel sympatyk hoe't er dat op in tige persoanlike wize die. Wat de ynhâld ongiet, wy hienen ús wat taret fansels. Ynstek fan ús wie 'Ljouwert' sintraal, yn it middelpunt fan tinken en ek kwa geografy. Net in perifear stedsje, mar in haadstêd mei mooglikheden. Wy hawwe him doe goed dúdlik makke dat yn ús fisy in suderseespoar 30 kilometer súdlik fan Ljouwert de haadstêd ûnderstek dwaan soe. Nee, wy moasten goede noard-súd mar benammen ek east-west ferbinings hawwe. Yn dat ferbân hawwe wy benammen wiisd op it smelle gefaarlike stikje dyk fan de ôfslútdyk nei Harns. Wy seinen him dat dat dochs te gek foar wurden wie. Hy soe der wurk fan meitsje. En, al by syn ynstallaasje wie dat te fernimmen. In protte pommeranten oanwêzich, sawol út Den Haach as ek út Amsterdam. Syn speech, foar in grut part 2-talich, klonk my as lij wetter yn 'e earen. Hjir stie in man dy't goed harke hie. Hy neamde dêr yn 'e grutte tsjerke it stik fan Surch nei Harns 'een karrespoor', treflik oantsjutten foar in begjin fan in súksesfolle lobby. Dêr moast ik efkes oan tinke doe't minister Eurlings hjoed it ferdûbele stik iepene fan de N31. Wa wit hat dat iene noflike petear noch in stjitsje jûn oan itjinge hjoed in feestje foar fierd is.

stipe eigen Skotske steat groeit

'Neck and neck', it persintaazje Skotten dat foar in eigen steat (ûnôfhinklikens) is, groeit noch hieltyd en is no sawat like heech as it persintaazje tsjinstanners. De ûntjouwing fan de lêste jierren falt hjir te lêzen. Yn augustus 2007 wienen der noch 15% mear tsjinstanners as foarstanners, en no noch mar 2 %. Wat kin der yn oardel jier in soad feroarje! En wat yn Skotlân kin, kin fansels ek yn oare parten fan de wrâld... It toant wol oan dat it regear fan SNP yn Skotlân goed dwaande is. Gjin hegere gemeentebelestings, it omleech bringen fan belestings foar it bedriuwslibben, mear blau op strjitte. Hjir it oersjoch:

Agree that Scotland should negotiate independence:

August 2007 Yes: 35 per cent No: 50 per cent

November 2008 Yes: 35 per cent No: 43 per cent

February 2009 Yes: 38 per cent No: 40 per cent

Skotlân en de banken

Geregeld sjoch ik efkes op de webside fan ús susterpartij, de SNP (Scottish National Party). Noch altyd wurdt der wurke oan in ferlikend ûndersyk tusken dy partij en de FNP, ûnder oare oer de fraach oft de FNP neffens de leden meidwaan moatte soe oan de Twadde Keamerferkiezings. Om werom te kommen op de SNP, yn Skotlân is de fraach tige aktueel hoe't it komt mei de RBS, yn har beneaming Bank of Scotland. Fansels litte se dat 'Royal' gewurde, it Britske Keninklik hûs moatte se yn regio's lykas Skotlân net altefolle fan hawwe. Op har website hawwe se sels in spesjale banner 'Help us save bank jobs' en 'sign our petition'. De antwurden fan de SNP binne helder. Op dit stuit hat Skotlân te min (fiskaal) foech om de banken te helpen. Dat soe oerhevele wurde moatte nei de regio. Dêrmei kin heechweardige wurkgelegenheid behâlden bliuwe, mar ek ôflate saken lykas sponsoring troch banken en ynnovaasje. En dat ûnôfhinklikens it ferskil meitsje kin. Earst dan kinne se oplossings op maat meitsje foar de banken yn har regio. Mei oare wurden, gjin opskaling fan foech oer banken nei Europeesk of sels wrâldnivo, nee, werombringe nei de regio's en de minsken. De rabo en de Fryslân bank litte hjoeddeidei sjen dat koöperative en regionale banken mei minder risiko's der better foarsteane as de grutte lykas ING en Fortis.

De fûgels fan fantasia

Sakrekt krige ik dit berjocht fan skriuwer-keunstner Elmar Kuiper mei in nijsgjirrich meitsjende titel. Ik wit net oft ik sels hinne kin, mar eardere optredens fan him sprutsen my tige oan:

DE FÛGELS FAN FANTASIA

Elmar Kuiper skreau syn earste toanieltekst yn in linige, byldzjende en poëtyske taal dêr’t elemintêre tema’s as dea en iensumens net swak byspylje. Ferfrjemding, de langst om in oar te wêzen, stadichoan los te reitsjen fan de echte wrâld en op te gean yn in fiktive wrâld, binne wichtige skaaimerken fan it stik. Om dizze kearn hinne toarkje emoasjes as lust, agresje, benaudens en oergeunst. De fûgels fan Fantasia hat sawol absurde, dramatyske as teatrale trekken. Wês fan herte wolkom op ’e wrâldpremjêre fan dit oarspronklike Fryske stik!

útfieringsdatum                 plak                tiid                  lokaasje

fr 27 febrewaris                   Húns               20.00              De Murdhoun     

sn 28 febrewaris                 Húns               20.00              De Murdhoun

entree € 6  reservearje: 0517 341100 of elmarkuiper@hotmail.com

Fakatuere - meiwurker ûndersyksstifting EFA

Foar it ûndersyksburo fan de EFA, Centre Maurits Coppieters (CMC), wurdt in administratyf koördinator frege. Stânplak is Brussel en der wurdt ûnder oare in goede kennis fan Ingelsk, Frânsk en finânsjes frege. Mear ynformaasje kinst hjir fine. In gaadlike kandidaat hat útsjoch op in fêste baan. Ast fragen hast oangeande de EFA of CMC kinst altyd kontakt mei my opnimme. Adresgegevens steane hjirneist. Mar fansels steane yn 'e fakatueretekst ek kontaktgegevens. Ast belangstelling hast, stjoer foar 20 febrewaris dyn sollisitaasje. In soad súkses.