Korsika wol mear romte foar de eigen taal

AJACCIO – De oerheid fan it eilân Korsika wol de eigen taal in offisjele status jaan. It Korsikaansk soe njonken it Frânsk in offisjele taal fan it eilân wurde. Dat is in unikum yn it sintralistyske Frankryk, dat oant no ta amper romte jout oan regionale talen. Fan de 300 tûzen ynwenners fan it eilân prate sa’n 40 tûzen Korsikaansk. It Korsikaansk is nau besibbe oan it Italjaansk.

Hoewol’t de Frânske grûnwet foarskriuwt dat de taal fan de oerheid it Frânsk is, binne der neffens it eilânbestjoer wol mooglikheden foar lokale oerheden om it Korsikaansk te brûken, bygelyks mûnling yn gemeenteriedsgearkomsten. Fierders soene de doarpen en stêden op it eilân offisjele Korsikaanske nammen krije kinne. Korsika wol ek dat it Korsikaansk in gruttere rol op skoalle kriget.

As earste wol Korsika begjinne mei in nij personielsbelied: by fakatueres foar amtlike funksjes soene kandidaten dy’t Korsikaansk kenne foarrang krije. It eilân wol fierders subsydzje jaan oan media dy’t it Korsikaansk brûke. Op oerheidsgebouwen hingje al langer twatalige buordsjes en de paadwizers binne ek almeast twatalich, lykas op de foto te sjen is. Paul-Felix Benedetti fan it eilânbestjoer seit dat er hopet dat it Frânske parlemint de wil fan de Korsikanen respektearret en eventuele wetten feroarje sil dy’t mear twataligens op Korsika yn it paad steane.

Boarne: It Nijs

Sybren Monday 08 August 2011 at 1:58 pm | | Default

No comments

Emoticons

(register/login)
Remember personal info?
Notify
Hide email
Small print: All html tags except <b> and <i> will be removed from your comment. You can make links by just typing the url or mail-address.
« Meartalich fuortset û… | Home | Súd-Tirol »