Juster hie ik wer in gearkomste fan it bestjoer fan de EFA yn Brussel. De organisaasjes fan partijen lykas de FNP foar Fryslân, de Katalanen, de Skotten ensfh. dy't 6 leden hat yn it Europeesk parlemint. Altyd wer yndrukwekkend om troch it gebou te rinnen dêr't al dy Europeeske parlemintariërs byelkoar komme. Mar benammen ek, wat binne de lêste nijtsjes? Ik hearde dat Centre Maurits Coppieters, in soarte fan 'wittenskiplik buro' fan de EFA ûndersyk dwaan lit nei hoe't de 'lytsere' partijen yn Europa, yn de ferskate lidsteaten, faak tsjinwurke wurde. In ferneamd ûndersiker fan de London school of Economics sil it útfiere, sa haw ik begrepen. Sa stadichoan witte wy wol wat de taktiken binne fan guon gruttere partyijen. Hege kiesdrompels ynstelle, partijen yn alle kiesdrompels registrearje litte mei in minimum tal minsken dat tekenet, grutte finansjele behinderingen, it net legaal ferklearjen fan politike partijen (ek al foldogge se oan alle easken) ensfh. Ik sit no hast 2 jier yn it bestjoer fan de EFA mar ik skrik alle kearen wer fan it gebrek oan demokrasy yn alle úthoeken fan Europa. Neffens my hawwe de Masedoaniërs yn Bulgarije en Grikelân it wol hiel dreech.  Op himsels yndied net grutte folksgroepen kwa oantal, mar dochs. Wat de Bulgaarske steat wol net dien hat om de politike partij fan dy befolkingsgroep it libben soer te meitsjen... Der spilet no ek wer fan alles mei de Koerden en it eventueel lidmaatskip fan de EU. In folk fan mear as 20 miljoen minsken. Mar lykweardigens is noch fier te sykjen. Ik bin benijd wat it ûndersyk opsmite sil. Grif skokkend Der wurdt sein dat de kommende jierren de bearput flink iepen gean sil mei tal fan saken. De doofpotten iepen, wat my oangiet!

It FD iepene juster mei de kop 'Minder geld voor Friese hulp daklozen'. In koarte gearfetting stiet hjirûnder.

Minder geld voor Friese daklozen

Oant safier it stik yn it FD. Yn wêzen wurdt Ljouwert hjirmei straft foar in goed previntyf belied. Der wurdt net goed sjoen wa't it goed docht en wa net. In ôfbraak fan foarsjennings yn Fryslân leit yn 'e reden, as de plannen it regear (steatssiktaris Bussemaker, jawis: PvdA) trochgean. Miskien in retoaryske fraach: is dit rjochtfeardich en earlik? Blykber telle net de arguminten, mar sa as faker mear de effektive lobby fan de G4 - de 'grutte' stêden Amsterdam, Rotterdam, De Haach en Utert. Dy 4 krije der mar leafst € 18,4 miljoen by. It pleitet op 'e nij foar in oanpassing fan de steatsynrjochting fan Nederlân.